सत्ता समिकरण बारे एमालेमा गम्भिर मतभेद

पौडेलको विपक्षमा मतदान गर्न हृवीप जारी
२७ पौष, काठमाडौं । सत्ता समिकरणका विषयलाई लिएर नेकपा एमालेलेमा गम्भिर मतभेद देखिएको छ ।
वरिष्ठ नेता समेत रहेका प्रधानमन्त्री माधवकुमार नेपाल र नेता केपी शर्मा ओली पक्षले कांग्रेस उम्मेदवार रामचन्द्र पौडेलको विपक्षमा मतदान गर्ने केन्द्रीय कमिटीको निर्णय उल्टाउन माग गरेपछि एमाले भित्रको विवाद चुलिएको हो ।
आफ्ना उम्मेदवारको विपक्षमा मतदान गरे सरकारबाट बाहिरिने कांग्रेसको धम्कीपछि नेपाल र ओली पक्षका नेताहरुले बालुबाटारमा मंगलबार छुट्टै भेला गरेर तत्काल केन्द्रीय कमिटीको बैठक बोलाउन र निर्णय उल्टाउन नेतृत्वलाई दबाब दिने सहमति गएका छन् ।
एक नेताका अनुसार बुधबार प्रधानमन्त्री निर्वाचन भन्दा अघि नै बैठक बोलाउन अध्यक्ष झलनाथ खनाललाई लिखित आग्रह गर्ने तयारी भइरहेको छ ।
उनीहरुले आइतबारबाट सुरु हुने भनिएको केन्द्रीय कमिटी बैठक स्थगित गरेकोमा आक्रोस पाखेका छन् । तर संस्थापन पक्षले भने छुट्टै भेलाको कुनै औचित्य नरहेको भन्दै पौडेलको विपक्षमा मतदान गर्ने निर्णय परिर्वतन नहुने बताएको छ ।
एमाले सचिब युवराज ज्ञवालीले यसअघि केन्द्रीय समिति बैठकले लिएको निर्णयमा पार्टी अडिग रहेको बताउनुभयो ।
‘यसअघि जे निर्णय भएको हो त्यो यथावत हुन्छ,’ सचिब ज्ञवालीले भन्नुभयो, ‘स्थायी समितिले केन्द्रीय समितिको निर्णय लागु गराउने हो, परिवर्तन गर्ने होइन ।’
पौडेलको विपक्षमा मतदान गरे सहकार्य तोड्ने कांग्रेसको धम्कीबारेको जिज्ञासामा सचिब ज्ञवालीले त्यसको कुनै अर्थ नरहेको बताउनुभयो ।
‘कांग्रेसको चेतावनीको अर्थ छैन,’ उहाँले भन्नुभयो, ‘प्रधानमन्त्रीले राजीनामा दिइसकेको कामचलाउ सरकारबाट जति मन्त्री फिर्ता भए पनि अर्थ छैन ।’ सत्ता समिकरण बारे साझा धारणा बनाउने एमाले स्थायी कमिटीको बैठक अहिले बसिरहेको छ ।
यसैबीच एमाले संसदीय दलले बुधबार हुने प्रधानमन्त्रीको निर्वाचनमा अनिवार्य उपस्थित हुन र कांग्रेस उम्मेदवार रामचन्द्र पौडेलको विपक्षमा मतदान गर्न पार्टी सभासदहरुलाई हृवीप जारी गरेको छ ।
मुख्य सचेतक भीम आचार्यद्वारा जारी विज्ञप्तिमा पौडेलले प्रधानमन्त्रीको उम्मेदवारी फिर्ता नलिए विपक्षमा मतदान गर्न निर्देशन दिइएको छ ।